Дубрава. Бровар і фальварак Адамарын

У мястэчку Дубрава, а некаторыя пішуць назву, як Дуброва, Маладзечанскага раёна, ёсць некалькі старадаўніх помнікаў: гарадзішча, каталіцкі касцёл, праваслаўная царква і бровар. На працягу ўсёй гісторыі гаспадарамі тут былі розныя вядомыя на Беларусі прадстаўнікі заможнай шляхты і магнатаў.

У 19 стгоддзі Хмары будуюць свой маёнтак ад якога нічога не засталося да нашага часу, акрамя касцёла і бровара. У касцёле створана крыпта, дзе знайшлі свой спачын некалькі каленаў рода Хмараў. А на ўскрайку вёскі каля вадасховішча ёсць мураваны бровар.

Бровар мураваны, узведзены на мяжы 19 – 20 стагоддзяў з бутавага камяня і чырвонай цэглы. Будынак двухпавярховы з узвышанай цэнтральнай часткай, якая мае высокія стрэльчатыя вокны. Бровар нечым падобны на панскі палац. У мястэчку захавалася яшчэ некалькі гаспадарчых пабудоў: адзін будынак у паўзруйнаваным стане, таксама ўзведзены з цэглы і камяня, а другі – прыстасаваны пад жылы дом.

Побач з Дубравай быў фальварак Адамарын, дзе нарадзіліся выбітныя беларускія навукоўцы  Бенедзікт і Уладзіслаў Дыбоўскія. У мястэчку Дубрава на мясцовай школе ўсталявана памятная шыльда Бенядзікту Дыбоўскаму (1833 - 1930), дзе напісана : «У фальварку Адамарын ля в. Дубрава ў 1833 г. Нарадзіўся Бенедыкт Іванавіч Дыбоўскі актыўны ўдзельнік паўстання 1863 г.Буйны вучоны – біёлаг. Акадэмік.». Пры школе ёсць краязнаўчы музей.