Чачэрск. Спаса-Праабражэнская царква.

Спаса-Праабражэнская царква пабудавана ў 1783 годзе ў цэнтры мястэчка Чачэрск на замову графа Захарыя Чарнышова, які імкнуўся пераўтварыць Чачэрск у квітнеючы ўзорны горад. Пабудавана царква ў стылі класіцызму. Гэта мураваны двух'ярусны храм - ратонда. У плане збудавання круг з унутраным диаметрам 15 метраў. Царква завершана паўсферычным купалам на ступеністым барабане. Над галоўным уваходам пабудавана васьмерыкавая вежа-званіца, якая накрыта гранёным купалам. А з усходняй часткі да царквы прылягае прамавугольная ў плане алтарная апсіда. Асноўны аб'ём будынка падзелены на ярусы дарычным антаблементам. Асноўнае памяшканне царквы ўяўляе сабой адзіную прастору. Над уваходам у залі пабудаваныя драўляныя хоры. Інтэр'еры былі ўпрыгожаны каляровымі роспісамі.