Чачэрск. Палац Чарнышовых - Круглікавых.

Чачэрск пасля падзелаў Рэчы Паспалітай расійскай імператрыцай быў падараваны Захарыю Чарнышову, які разгарнуў у мястэчку вялікае будаўніцтва. Да нашага часу захаваўся палац Чарнышовых – Круглікавых, які быў пабудаваны ў 19 стагоддзі і за сваю гісторыю шмат разоў быў перабудаваны. Чарнышоў першы свой палац у Чачэрску пабудаваў на тэрыторыі замка, цяпер гэта Замкавая гара. Паколькі Чарнышовы былі ў той час у Расійскай імперыі аднымі з самых уплывовых дваранскіх родаў, то сюды ў тыя гады нярэдка заязджалі каранаваныя асобы. Тым больш што графіня Ганна Радзівонаўна Чарнышова, жонка З.Чарнышова, была хроснай імператара Аляксандра І. У 1781 годзе Чачэрск наведаў вялікі князь Павел Пятровіч з жонкай Марыяй Фёдараўнай. Яны правялі тут некалькі дзён. Чарнышовы для сваіх высокіх гасцей зладзілі вялікае свята: была паказана опера “Новае сямейства”. Каля вандроўкі па нашых краях імператрыца Кацярына ІІ наведала графіню Чарнышову ў 1787 годзе. У 1850 годзе наведалі Чачэрск імператар Мікалай І са спадчыннікам Аляксандрам Мікалаевічам, а ў 1857 годзе – імператар Аляксандр ІІ з жонкай. Гэты мураваны двухпавярховы палац, які захаваўся да нашага часу, паводле адных крыніц, пабудаваны ў пачатку 19 стагоддзя, а паводле іншых, – у сярэдзіне стагоддзя. У сярэдзіне 19 стагоддзя Соф'я Чарнышова выйшла замуж за Івана Круглікава, і ўладальнікамі маёнтка сталі Круглікавы. З 1905 года ля збудавання размяшчалася школа. Падчас вайны памяшканне моцна пацярпела, але было адрэстаўравана. Тут была бібліятэка, Дом піянераў і нават бальніца. Цяпер збудаванне знаходзіцца ў занядбаным стане і яго спрабуюць прадаць.