Віцебск. Васкрасенская царква.

Калі шпацыруеце па гістарычнаму цэнтру Віцебска, вашу ўвагу абавязкова прыцягне выгляд незвычайна прыгожага храма, які знаходзіцца злева ад ратушы, на былой гандлёвай плошчы. Васкрасенская царква будавалася ў 1772-1779 гадах у стылі тагачаснага віленскага барока як уніяцкі храм па фундацыі віцебскага мешчаніна Мікалая Смыка з дапамогай цэха майстроў-кажамякаў. Тут, на гэтым месцы, калісьці ўжо існавала драўляная Васкрасенская царква. У час вайны з Напалеонам у 1812 годзе фрнцузы стварылі у храме фуражны склад. У 1834 годзе перададзена праваслаўным вернікам. Храм знеслі ў 1936 годзе.

Адноўлены ён быў у 2008 годзе на тых жа падмурках. Царква пабудавана ў стылі позняга віленскага барока, а інтэр’ер быў аздоблены ў стылі ракако. Храм уяўляе з сябе мураваны аднанефны двухвежавы  будынак з паўкруглай апсідай, над якой узвышаецца “карона” - хвалісты франтон. Галоўны фасад таксама мае хвалістую плоскасць з насычаным ляпным дэкорам. Паміж вежамі знаходзіцца фігурны порцік.  Васкрасенская царква знаходзіцца ў самым гістарычным сэрцы Віцебска, вакол храма безліч цікавых помнікаў і будынкаў. Проста насупраць царквы – помнік Вялікаму князю літоўскаму Альгерду. А справа і перад царквой - пешаходныя вуліцы.