Ула. Касцёл Святой Тройцы.

Мястэчка Ула вядома яшчэ з часоў Вялікага княства Літоўскага ў 15 стагоддзі. У тыя часы на месцы зліцця дзвюх рэк Улы і Заходняй Дзвіны быў пабудаваны замак, які з часам быў разбураны. І на гэтым месцы ў 17 стагоддзі была пабудавана першы драўляны касцёл у імя Святога Духа. Заснавальнікамі каталіцкай святыні былі каралеўскі сакратар Яўстафій Лукомскі і Браніслаў Прысецкі. Быў таксама заснаваны каталіцкі дамініканскі кляштар, які існаваў пры касцёле. Дамініканскі ордэн зарадзіўся ў Заходняй Еўропе ў 12 стагоддзі.

У пачатку XIX стагоддзя новы ўладальнік гэтых земляў Ігнацій Рэут падарыў касцёлу новую зямлю. Магілёўскі арцыбіскуп Станіслаў Богуш-Сестранцэвіч зацвердзіў статус храма як парафіяльнага. Каменны касцёл захаваўся да нашага часу ў перабудаваным стане.

Касцёл Святога Духа, а ў некаторых крыніцах ён указваецца як касцёл Святой Тройцы, пабудаваны ў 1853-1864 гадах у стылі класіцызму. Галоўны фасад упрыгожвалі дзве трох'ярусныя вежы, знесеныя ў савецкі час. У 1876 годзе Улу наведаў вядомы беларускі мастак і кампазітар Напалеон Орда і намаляваў тагачасны касцёл.

У 1930-я гады каталіцкую святыню закрылі і перадалі клубу. Пасля распаду СССР будынак аддалі католікам. Праведзена рэстаўрацыя, касцёл дзейны.

За касцёлам адкрываюцца прыгожыя краявіды ў месцы зліцця дзвюх рэк. Храм пабудаваны на месцы былога замка, захаваліся рэшткі земляных умацаванняў. Перад касцёлам справа праходзіць брукаваная вуліца, выкладзеная каменем, якая вядзе да пляжу на Заходняй Дзвіне.