Старая Жосна. Руіны капліцы 17 стагоддзя.

   У Мядзельскім раёне паміж пасёлкамі Гулі, Слабада і Навасёлкі знаходзяцца руіны каменнай капліцы 17-га стагоддзя. Раней тут была сядзіба Снарскіх, якая называлася Старая Жосна. Ад сядзібы і капліцы засталіся цяпер толькі руіны, і нават тапоніма Старая Жосна ўжо няма.

          Руіны капліцы размяшчаюцца на ўзгорку за адзін кіламетр на ўсход ад вёскі Гулі каля самай дарогі Мядзел-Докшыцы.

         Капліца была пабудавана ў радавым маёнтку Снарскіх у другой палове 17-га стагоддзя ў стылі рэнесанс. Над капліцай заступаліся манахі каталіцкага ордэна бернардзінцаў з мястэчка Будслаў. У 19 стагоддзі ў часы Расійскай імперыі капліца была прыпісана да прыходу ў мястэчку Ваўкалата Докшыцкага раёна.

         Храм дзейнічаў і ў часы Расійскай імперыі, і ў перыяд Польскай дзяржавы ў 1921-1939 гадах да прыходу савецкай улады.

        Капліца была мураваная, узведзена з цэглы і атынкавана. Мела цэнтрычную пабудову. Франтон і ўваходны партал мае характэрны дэкор, круглыя аконныя праёмы, мур сцен – усё гэта кажа аб характэрных рысах стылю Рэнесанс.

       Сядзібу разбурылі пасля Вялікай Айчыннай вайны. Капліцу ўзарвалі ў 1950-я гады. Захаваўся часткова галоўны фасад. Таксама ёсць руіны некалькіх каменных гаспадарчых пабудоў сядзібы Снарскіх.