Мінск. Дом Абрампольскага.

   У Мінску на плошчы Незалежнасці знаходзіцца дарэвалюцыйны дом Абрампольскага. Будынак узведзены ў стылі мадэрн на вуліцы Савецкай-17. Да рэвалюцыі вуліца называлася Захар'еўская. Будынак узведзены беларускім архітэктарам Станіславам Гайдукевічам.

           Прыбытковы дом пабудаваны ў 1912 годзе, і яго гаспадаром быў Эмануіл Абрампольскі, які працаваў дырэктарам банка. На першым паверсе некалькі пакояў здымала княгіня Магдалена Радзівіл, якая вядомая як мецэнатка і грамадская дзяячка. Княгіня актыўна падтрымлівала беларускую нацыянальную культуру. На другім паверсе жыў сам Абрампольскі з сям'ёй.

             Пасля рэвалюцыі будынак нацыяналізавалі, і тут былі кватэры беларускага аддзела Аб'яднанага дзяржаўнага палітычнага ўпраўлення. Тут жа знаходзіліся кватэры партыйнага і дзяржаўнага кіраўніцтва Савецкай Беларусі. У перыяд 1919-1931 гадах тут жыў наркам земляробства і сакратар Мінскага гаркама кампартыі Адам Славінскі. У тыя часы будынак меў неафіцыйную назву першы Дом Саветаў. Таксама ў гэтым доме жыў вядомы беларускі грамадскі і палітычны дзеяч Дзмітрый Прышчэпаў.

       У гады Вялікай Айчыннай вайны ў доме былі канспіратыўныя кватэры савецкіх падпольшчыкаў. Пасля вайны тут былі жылыя кватэры, і ў тым ліку жыў акадэмік Васіль Папоў.