Гродна. Будынак мужчынскай гімназіі (вул. Савецкая, 6).

У горадзе Гродна на пешаходнай вуліцы Савецкай, пад нумарам 6, знаходзіцца каменны двухпавярховы будынак былой мужчынскай гімназіі. Помнік узведзены ў 18 стагоддзі. Будынак некалькі разоў перабудоўваўся.

Першапачаткова будынак належаў каталіцкаму дамініканскаму манастыру, які быў узведзены ў 1735 годзе ў часы Вялікага Княства Літоўскага. Акрамя манастырскіх памяшканняў тут працавала Гродзенская Дамініканская гімназія.

У часы Расійскай імперыі пасля антырасійскага паўстання 1830 – 1831 гадоў манастыр зачынілі, і тут пачала працаваць мужчынская гімназія. А касцёл кляштарны, які быў наступным будынкам па вуліцы, і да нашага часу не захаваўся, перадалі пад касцёл гімназіі.

У гімназіі выкладалі вядомыя настаўнікі і навукоўцы. Многія выпускнікі навучальнай установы сталі вядомымі дзеячамі ў Беларусі і за межамі нашай краіны. Тут выкладаў гісторык і краязнаўца Яўстафій Арлоўскі (1863-1913). Вучыўся родны брат К. Каліноўскага - Віктар Каліноўскі. Выпускнік гімназіі Юзаф Ёдкоўскі (1890-1950) - археолаг і нумізмат, заснавальнік музея ў Гродне. У гімназіі выкладаў грэчаскую і лацінскую мовы Ёнас Яблонскіс - аўтар першай літоўскай граматыкі.

Пасля Рыжскага міру 1921 года Гродна перайшло пад уладу польскай дзяржавы да 1939 года. У гэты перыяд у будынку працавала жаночая гімназія імя Эміліі Плятэр і кнігарня.

З прыходам савецкай улады з восені 1939 года і да пачатку Вялікай Айчыннай вайны тут размяшчалася сярэдняя школа № 11.

Пасля вайны будынак прыстасавалі пад каўбасны цэх мясакамбіната, а затым памяшканні прыстасавалі пад жылыя кватэры. І цяпер тут жылыя кватэры і салон «Евросеть».