Гродна. Дом віцэ-адміністратара 18-га стагоддзя.

У горадзе Гродна на плошчы Тызенгаўза захаваўся будынак 18 стагоддзя, які вядомы, як дом віцэ – адміністратара. Будынак узведзены ў гістарычным квартале Гарадніцы. Дом праектаваўся па даручэнню Антонія Тызенгаўза (1733 - 1785) – гарадзенскага старасты, падскарбія надворнага літоўскага, мецэната, грамадскага і палітычнага дзеяча ў Вялікім Княстве Літоўскім у часы караля Станіслава Аўгуста Панятоўскага.

Будынак з'яўляўся часткай архітэктурнага ансамбля 18 стагоддзя на Гарадніцы. Архітэктары Мёзер і Сака. Будынак быў, як «гасцявы дом» прызначаўся для размяшчэння гасцей.

Напрыканцы 18 стагоддзя ў гэтым будынку жыў прадстаўнік шляхецкага рода Мацей Тадэвуш Эйсмант, які быў віцэ – адміністратарам Гродзенскай эканоміі і займаўся фінансавымі пытаннямі. Эйсманту будынак падараваў апошні кароль Рэчы Паспалітай Станіслаў Панятоўскі.

У часы Расійскай імперыі ў пачатку 19 стагоддзя ў будынку быў шпіталь, затым тут размяшчалася паштовая кантора Гродзенскай губерніі. 

Пасля вялікай Айчыннай вайны ў будынку працаваў цэнтральны гістарычны архіў БССР. У апошнія гады памяшканні ў будынку былі адрэстаўраваныя. Перад будынкам усталявана скульптура «Скам'я архітэктараў», дзе адлюстраваныя архітэктары Мёзер і Сака.