Браслаў. Царква Нараджэння Панны Марыі.

Касцёл Нараджэння Дзевы Марыі - велічны храм, размешчаны ў цэнтры Браслава побач з Замкавай гарой, з якой, па некаторых версіях, ён звязаны таемнымі падземнымі хадамі. Будаўніцтва касцёла было распачата ў 1824 годзе. У 1897 ён быў павялічаны і перабудаваны ў неараманскім стылі. Цяпер нават можна заўважыць адрозненні паміж старым і новым мурам. Гэта надае касцёлу яшчэ большы шарм.

Дзеянні Другой сусветнай вайны не абышлі бокам храм Нараджэння Дзевы Марыі. Падчас акупацыі Браслава пробашч касцёла быў расстраляны нацыстамі за дапамогу яўрэям. У 1950 годзе храм быў зачынены і пераўтвораны ў збожжасховішча. І толькі ў 1967 годзе ён зноў адчыніў свае дзверы прыхаджанам. Папярэдне тут быў праведзены рамонт і аднаўленчыя работы.

Храм мае двухсхільны дах, а галоўны фасад упрыгожвае трох'ярусная вежа-званіца. Будынак пабудаваны з каменя ў спалучэнні з чырвонай цэглай. Сцены маюць вельмі незвычайную архітэктурную асаблівасць, якая атрымала назву "Браслаўская мазаіка". Пры ўзвядзенні касцёла паміж вялікімі камянямі замест звычайнага вапнавага раствора была пакладзена яго сумесь з дэкаратыўнымі маленькімі каменьчыкамі, якія ствараюць ілюзію мазаікі. Унутранае ўбранне таксама ўражвае сваёй прыгажосцю. На ўсходняй сцяне намаляваны сонца, упісанае ў круг, і ваза з кветкамі. Гэтыя малюнкі захаваліся яшчэ з часоў касцёла 1824 года. Мясцовыя жыхары ганарацца размешчаным у сценах касцёла арганам, які быў створаны яшчэ ў пачатку XX стагоддзя.

Пры касцёле Раства Дзевы Марыі ўжо больш за 80 гадоў дзейнічае манаскі Дом сясцёр, заснаваны ў 1939 годзе. Сёстры актыўна ўдзельнічаюць у рэлігійным жыцці, дапамагаюць пажылым, хворым і нямоглым людзям, даглядаюць храм і рыхтуюць яго да свят.

Яшчэ адной асаблівасцю і галоўным гонарам касцёла з'яўляецца цудатворны абраз Божай Маці “Каралева азёр” ці “Валадарка азёраў”, як часцей называюць яе мясцовыя. У 2009 годзе абраз быў каранаваны і стаў 7 абразам у Беларусі і першым у Віцебскай вобласці, ганараваным такім гонарам.

22 жніўня 2009 года браслаўская каталіцкая парафія Нараджэння Найсвяцейшай Панны Марыі перажывала велічную і значную падзею – каранацыю папскімі каронамі цудатворнага абраза Маці Божай Валадаркі Азёраў. Падрыхтоўка да гэтай урачыстасці вялася на працягу доўгага часу. У ёй удзельнічалі як прадстаўнікі духавенства, так і парафіяне з розных куткоў Беларусі, найперш з Віцебскай дыяцэзіі, а таксама з-за мяжы. Кароны на абраз Маці Божай былі зроблены ў Кракаве па праекце мастака кс. Антонія Паланяка. 18 лютага 2009 года на плошчы Святога Пятра ў Ватыкане іх асвяціў Папа Рымскі Бенедыкт XVI.

На плошчы каля касцёла, паводле розных ацэнак, сабралася ад пяці да дзесяці тысяч вернікаў католікаў з розных гарадоў Беларусі і шэрагу іншых краін. Многія пілігрымы прыйшлі пакланіцца браслаўскай святыні пешшу. На цырымоніі прысутнічалі паслы і прадстаўнікі дыпламатычных місій, каля 30 іерархаў каталіцкай царквы з 11 краін, а таксама прадстаўнікі Грэка-каталіцкай і Рускай праваслаўнай цэркваў.

Залатыя кароны былі апрануты спачатку на немаўля Езуса, а затым на Божую Маці, намаляваныя на абразе. Затым біскуп віцебскі Уладзіслаў Блін здзейсніў акт пасвячэння віцебскай каталіцкай епархіі пад апеку Божым Маці Браслаўскай Уладычыцы Азёр, пасля чаго абраз паставілі высока над алтаром-яхтай для ўсеагульнага агляду вернікаў. Пасля гэтага вернікі з розных краін паднеслі ахвярныя дары абразу. Сярод іх былі залатыя пацеркі, некалькі залатых чар, абрусы для алтара, партрэты папы Яна Паўла Другога, іконы, свечкі.