Відзы. Праваслаўная Свята-Успенская царква.

У самым цэнтры пасёлка Відзы, архітэктурнай дамінантай з'яўляецца каталіцкі касцёл Святой Тройцы. Калі прайсці крыху направа ад дарогі каля касцёла, то ўбачыце незвычайную царкву, якая належыць стараабраднікам. Стараабраднікі, ці стараверы, з'явіліся на землях Беларусі яшчэ ў 17 стагоддзі, калі ў Маскоўскім царстве праводзілася царкоўная рэформа. Частка насельніцтва не падтрымала рэформу і зазнала за гэта пераследы з боку ўладаў. І стараабраднікі збеглі ў суседнія дзяржавы, у тым ліку на тэрыторыю Рэчы Паспалітай, у складзе якой была і Беларусь. Першыя стараабраднікі з'явіліся ў Відзах у XVIII стагоддзі.

Новы цагляны храм для стараабраднікаў быў пабудаваны ў 1907-1910 гадах па праекце вядомага беларускага архітэктара Лявона Вітан-Дубейкаўскага.

Л. Вітан-Дубейкоўскі (1869 - 1940) - беларускі паэт, архітэктар і інжынер-будаўнік, грамадскі і палітычны дзеяч. Вучыўся ў Варшаве, Санкт-Пецярбургу і Парыжы. Ён распрацаваў беларускі нацыянальны архітэктурны стыль. Пахаваны ў Вільні.

Царква атрымала назву ў гонар Успення Прасвятой Багародзіцы. Будынак з'яўляецца помнікам архітэктуры. Царква пабудавана ў стылі мадэрн. Прастакутная ў плане, мае пяцікутную апсіду. Пакрыта двухсхільным дахам. Над алтарнай часткай узведзены васьмікутны барабан, які завяршаецца купалам. Над уваходам размешчана шмат'ярусная вежа.