Магілёў. Парк Паднікалле.

Тэрыторыя, на якой быў закладзены парк, мае вельмі багатую гісторыю. Здаўна яна была вядома пад назвай Пакроўскі пасад. Гэта адзін з рамесных кварталаў горада, дзе жылі і працавалі рамеснікі розных прафесій.

Сёння Паднікалле - гэта ідэальнае месца, дзе можна павольна прагуляцца і адпачыць ад паўсядзённай мітусні. Тэрыторыя парка вялікая і дагледжаная. Тут кожны знойдзе занятак для сябе. Для ахвочых ёсць веласіпедныя дарожкі. Можна ўзяць у арэнду электрасамакаты і пракаціцца з ветрыкам па ўсёй тэрыторыі. Парк абсталяваны спартовымі трэнажорамі, на якіх можна пазаймацца ўсёй сям'ёй. Для дзяцей арганізавана дзіцячае мястэчка з арэлямі, горкамі, батутамі; для дарослых - шмат лавачак для адпачынку, альтанкі, дарожкі для пешай прагулкі і "сцежка здароўя", тэматычныя зоны для фотасесій. Для ахвочых падсілкавацца тут ёсць кафэ, а таксама палаткі з вулічнай ежай і напоямі.

Адно з галоўных упрыгожванняў парка - лесвічны спуск даўжынёй 27 метраў, які складаецца з 250 прыступак, з каскаднымі фантанамі. Верхняя кропка лесвіцы - гэта выдатная назіральная пляцоўка, з якой адкрываецца цудоўны від на парк і наваколлі. Асабліва хораша ўсходы глядзіцца з падсвятленнем у вячэрні час.

Тут у парку праходзяць розныя гарадскія мерапрыемствы, выставы, марафоны, фестывалі. Напярэдадні Новага года прадпрыемствы і арганізацыі Магілёва спаборнічаюць у лепшым святочным упрыгожванні, устаноўленым кожным з іх у парку.

У парку ёсць два важныя гісторыка-культурныя помнікі: Свята-Мікалаеўскі манастыр, гісторыя якога пачынаецца з 17 стагоддзя, і храм Пакрова Прасвятой Багародзіцы, пабудаваны на месцы страчанай больш за 70 гадоў таму царквы 17 стагоддзя.