Сычкава. Бабруйскі раённы гісторыка-краязнаўчы музей.

Бабруйскі раённы краязнаўчы музей быў заснаваны ў 1990 годзе.

Сёння яго наведвальнікі могуць азнаёміцца з археалагічнымі знаходкамі, выяўленымі на тэрыторыі раёна, экспазіцыяй этнаграфіі, якая адлюстроўвае жыццё і традыцыі беларускай вёскі канца XIX – пачатку XX стагоддзяў, багатай калекцыяй матэрыялаў часоў Вялікай Айчыннай вайны, а таксама стэндамі, прысвечанымі вядомым асобам, якія праславілі Бабруйшчыну.

Музей займае будынак агульнай плошчай 264 кв. м. і ўключае ў сябе тры пастаянныя экспазіцыі.

Асноўная мэта работы музея - папулярызацыя гістарычнай спадчыны Бабруйшчыны, выхаванне патрыятызму і грамадзянскасці ў маладога пакалення. У залах прадстаўлены артэфакты, якія ілюструюць першабытны лад, матэрыялы пра жыццё і дзейнасць выбітных ураджэнцаў краю, такіх як У. I. Дунін-Марцінкевіч, заснавальнік беларускай драматургіі, прадстаўнікі Бабруйскай галіны нашчадкаў А. С. Пушкіна, творчасць паэта М. Аўрамчыка і пісьменніка А. Адамовіча.

У выставачных залах экспануюцца лепшыя работы мясцовых майстроў.

Таксама музей прапануе экскурсійнае абслугоўванне, музейныя і тэматычныя заняткі, лекцыі. Сярод тэматычных экскурсій: "Літаратурная Бабруйшчына», «Вялікая Айчынная...», "Этнаграфія Бабруйшчыны". У музеі можна набыць сувеніры, вырабленыя рамеснікамі Бабруйшчыны.

Наведванне Сычкава - гэта не толькі знаёмства з экспанатамі музея, але і магчымасць ушанаваць памяць герояў мемарыяльнага комплексу «Курган Славы» і ўбачыць макет ДЗОТа, дзе М. Селязнёў здзейсніў свой подзвіг летам 1944 года.