Шуміліна. Чыгуначная станцыя 1866 года пабудовы.

Да 1962 года гэтая станцыя насіла назву Сіроціна, у гонар мястэчка, размешчанага ў дзевяці кіламетрах ад Шуміліна. Яна была адной з ключавых станцый Дынабургска-Віцебскай чыгункі, пабудаванай у 1863-1866 гадах, і якая злучала Віцебскую губерню на працягу 244 вёрст. Гэтая дарога, заснаваная буйнымі прамыслоўцамі з Рыгі і Лондана, з праўленнем у англійскай сталіцы, служыла важнай транспартнай артэрыяй, па якой перавозіліся транзітныя грузы з Віцебска ў Дзвінск (цяперашні Даўгаўпілс).

Станцыя ў Шуміліне - адна з найстарэйшых у Беларусі. Пасля пабудовы ў 1866 годзе, яе абслугоўвалі ў асноўным нямецкія спецыялісты, якія пасля перабраліся ў буйнейшы Віцебск.

Двухпавярховы будынак станцыі з прыбудаванымі аднапавярховымі крыламі, складаным двухсхільным дахам і арачнымі вокнамі ўяўляе сабой узор архітэктурнага стылю таго часу. Гарманічнае спалучэнне адценняў охры з белымі элементамі дэкору надае будынку элегантны і вытанчаны выгляд. Уздоўж платформы ўстаноўлены ліхтарныя слупы, упрыгожаныя вытанчанымі ўзорамі, а перад вакзалам узвышаецца бюст Пятру Мельнікаву – выдатнаму інжынеру, які кіраваў будаўніцтвам Рыга-Арлоўскай чыгункі. Менавіта Мельнікаў адправіў імператару тэлеграму са справаздачай аб паспяховым завяршэнні работ, калі першы паравоз з трыма вагонамі прайшоў праз станцыю.

Зусім побач са станцыяй, на той жа Вакзальнай вуліцы, можна ўбачыць яшчэ адзiн старадаўнi будынак - пакгаўз, які служыў складам пры чыгуначнай станцыі. Гэта цагляны аднапавярховы будынак з узорыстым аздабленнем уздоўж двухсхільнага даху і арачнымі вокнамі, на жаль, знаходзіцца ў закінутым стане і мае патрэбу ў рэстаўрацыі.

Гісторыя станцыі багатая характэрнымі падзеямі. Лічыцца, што тут бываў сам імператар Мікалай II і менавіта з гэтага будынка ў 1917 годзе ён адправіў тэлеграму аб адрачэнні ад пасаду. Дзіўна, але падчас Вялікай Айчыннай вайны, калі Шуміліна знаходзілася пад нямецкай акупацыяй, будынак чыгуначнай станцыі цудам ацалеў, стаўшы адзінай захаванай пабудовай у горадзе пасля вайны.

Наведванне гэтай старадаўняй чыгуначнай станцыі - магчымасць дакрануцца да гісторыі, адчуць сувязь часоў і ўбачыць, як правінцыйныя гарады Беларусі захоўваюць бясцэнныя сведчанні мінулага.

У глыбінцы часам можна знайсці вельмі цікавыя месцы, дзе калісьці вяршыліся лёсы людзей і дзяржаў...