Дзісна. Касцёл Беззаганнага Зачацця Найсвяцейшай Дзевы Марыі

Першы драўляны касцёл быў пабудаваны ў Дзісне ў 1630 – х гадах, які фінансаваў шляхціц з Полацкага ваяводства Хрыстафор Малкевіч-Хялчэўскі. Ён жа запрасіў у мястэчка і прадстаўнікоў каталіцкага ордэна францысканцаў. Быў пабудаваны цэлы комплекс будынкаў: касцёл, кляштар і званіца. І ў дадатак касцёлу быў падараваны маёнтак.

На месцы драўлянага касцёла быў пабудаваны каменны храм у стылі позняга барока ў 1773 годзе. І новы касцёл назвалі-Касцёл Беззаганнага Зачацця Найсвяцейшай Панны Марыі. У касцёле была крыпта з пахаваннямі.

Пасля антырасійскага паўстання 1830-1831 гадоў касцёл быў зачынены і францысканцы пакінулі мястэчка. Але ў 1839 годзе касцёл вярнулі вернікам. У другой палове 19-га стагоддзя адбыўся ў касцёле пажар, але будынак аднавілі. У часы польскай акупацыі ў касцёл зноў вярнуліся ксяндзы-францысканцы. Але ў 1940 годзе, пасля далучэння да Савецкага Саюза, касцёл закрылі, а ксяндза арыштавалі.  Падчас Вялікай Айчыннай вайны ў 1941 годзе касцёльныя пабудовы моцна пацярпелі ад пажару.

Пасля вайны парафіяне хацелі адбудаваць касцёл, але ўлады былі супраць. У 1958 годзе касцёл быў узарваны і палова будынка была разбурана.

У 2007 годзе пачаліся работы па аднаўленні Касцёла, і ў 2016 годзе ўсе сцены храма былі адноўлены. Зараз ідуць работы па рэстаўрацыі інтэр'еру.