Перадзелка. Сядзіба Суткаў.

Былы сядзібны комплекс размяшчаецца на высокім правым беразе Дняпра ў аграгарадку Перадзелка Лоеўскага раёна.

З 17 стагоддзя землі цяперашняга Лоеўскага раёна разам з прылеглымі вёскамі былі валоданнем сям'і Юдзіцкіх і працяглы перыяд пераходзілі па спадчыне розным яе прадстаўнікам. Адзін з прадстаўнікоў роду - Станіслаў Міхайлавіч Юдзіцкі пачаў узвядзенне сядзібы на гэтых землях.

У 1862 годзе маёнтак стаў уласнасцю сям'і Рудзееўскіх, якія завяршылі будаўніцтва.

Сядзібны дом з'яўляецца помнікам архітэктуры класіцызму. Двухпавярховы будынак з аднапавярховымі бакавымі флігелямі мае трохкутны франтон і шырокі балкон. У якасці дэкору будынка былі выкарыстаныя ліштва, сандрыкі, руст, філёнгі. 

Пазней маёнтак быў прададзены графу Бараноўскаму А.I. Апошняй жа ўладальніцай стала графіня Бараноўская Кацярына Васільеўна. Менавіта яна ўнесла вялікі ўклад у развіццё сядзібы і ўсяго маёнтка ў цэлым. Дзякуючы ёй былі пабудаваныя вадзяны млын, пільня, вінакурны завод, быў закладзены пладовы сад. Графіняй за ўласныя сродкі былі адкрыты 2 школы і земская бальніца. Аднак, пасля Кастрычніцкай рэвалюцыі 1917 года, яна разам са сваёй сям'ёй эмігравала ў Канаду.

У 1920 годзе на графскіх землях арганізавалі Таварыства па апрацоўцы зямлі: былі пашыраны плошчы палёў і лясоў, а таксама была ўдасканалена сельскагаспадарчая вытворчасць. 

З 1924 года і па цяперашні час у сядзібным доме размяшчаецца дзіцячы сад-школа.

Звонку будынак нядрэнна захаваўся. Тэрыторыя дагледжаная. Часткова захаваўся парк пейзажнага тыпу эпохі класіцызму з элементамі фруктовага саду і мясцовымі пародамі дрэў. За сядзібай адкрываецца выдатны від на Днепр.

Вядома, што ў канцы 60-х гадоў графіня Бараноўская прыязджала ў свой былы маёнтак у Перадзелке. Таксама прыязджала сюды ў 1991 годзе ўнучка графіні-Канадскі кінарэжысёр Кэтлін Бараноўская-Барзадзі. Яна здымала дакументальны фільм пра сядзібны комплекс.