Слабодка. Помнік "Беларусь партызанская".

На месцы помніка "Беларусь партызанская" ў гады Вялікай Айчыннай вайны праходзіла лінія фронту. У рукі партызан трапілі каштоўныя нямецкія дакументы з планамі фашысцкай арміі па наступу немцаў на паўднёвым фронце. Разам з дакументамі была знойдзена карта, дзе Кастрычніцкі раён Гомельскай вобласці быў абведзены ў круг і названы "стратэгічна важным напрамкам".

У самой вёсцы Слабодка зараз знаходзіцца абеліск на месцы пахавання партызан трыццаць сёмай брыгады імя генерала Пархоменкі, і воінаў Савецкай Арміі, якія загінулі пры вызваленні вёскі Слабодка.

З першых дзён Вялікай Айчыннай вайны жыхары Кастрычніцкага раёна ўключыліся ў барацьбу супраць нямецка-фашысцкіх захопнікаў. Ужо ў ліпені 1941 года з партыйнага і Савецкага актыву ў раёне быў створаны партызанскі атрад "Чырвоны Кастрычнік". Восенню 1941 года ў Кастрычніцкім раёне была створана партызанская зона. У 1942 годзе ў раёне была адноўлена савецкая ўлада, актыўна працавалі райвыканкамы і выканкамы сельскіх саветаў, праводзілася масавая палітычная праца сярод насельніцтва. Восенню таго ж года ў многіх населеных пунктах былі адкрыты савецкія школы.

Кожны трэці жыхар раёна загінуў у барацьбе з нямецка-фашысцкімі захопнікамі.

У чэрвені 1944 года 28-я армія ва ўзаемадзеянні з партызанамі вызваліла Кастрычніцкі раён ад нямецка-фашысцкіх захопнікаў. 16 савецкім воінам, якія здзейснілі подзвіг на тэрыторыі Кастрычніцкага раёна, прысвоена званне Героя Савецкага Саюза. 1 356 жыхароў раёна атрымалі баявыя ўзнагароды.

Помнік "Беларусь партызанская" ў Кастрычніцкім раёне Гомельскай вобласці - гэта сімвал усенароднай партызанскай барацьбы, у якой удзельнічалі не толькі мужчыны, але і жанчыны і дзеці. Помнік усталяваны на фоне лесу сярод высокіх дрэў. У скульптурнай кампазіцыі яго гучыць тэма партызанскага лесу, які хаваў, абараняў, саграваў і карміў народных мсціўцаў. Ансамбль са скульптур жанчыны, якая выходзіць з лесу, і прыціскаецца да яе хлопчыка, уяўляюць сабой сінтэз скульптур і ландшафту.

Подзвіг партызан назаўжды застанецца ў гісторыі Вялікай Айчыннай вайны як сімвал мужнасці, патрыятызму, вернасці абавязку Радзіме і краіне.