Гомель. Дом-камуна (праспект Леніна, 51).

Цагляны будынак мае форму падоўжанай літары "П" і займае цэлы квартал. Архітэктурная выразнасць дасягаецца спалучэннем 7-павярховых вертыкальных секцый, якія атачаюць цэнтральнае 6-павярховы прастору з бакавымі крыламі.

Фасады раўнамерна падзелены рызалітамі і паглыбленымі лоджыямі. Цэнтральныя рызаліты маюць ступеністае завяршэнне. Вуглавыя часткі будынка прыўзняты і паглыблены. Рытм аконных праёмаў, чаргаванне лоджый і гаўбцоў ствараюць пластыку фасадаў, пазбаўленых дэкаратыўных элементаў.

Дом быў пабудаваны ў 1929-1931 гадах па праекце Станіслава Шабунеўскага і інжынера Рыгора Ханіна як жыллё для рабочых вагонарамонтнага завода. Падобныя дамы-комплексы з памяшканнямі для грамадска-бытавога абслугоўвання з'явіліся ў тыя гады ў многіх гарадах. У Беларусі аналаг быў пабудаваны ў Бабруйску. Аднак, спраектаваная сістэма абслугоўвання не ўлічвала патрэбаў жыхароў, не ўсё было рэалізавана. Пакоі былі аб'яднаны ў кватэры. На першым паверсе размяшчаліся вестыбюль, сталовая, дзіцячы сад, гурткі і бібліятэка. Дом імя Парыжскай Камуны быў самым высокім і буйным будынкам у даваенным Гомелі. Таксама гэта быў першы ў Гомелі дом, абсталяваны ліфтам.

Пасля пашкоджанняў у гады Вялікай Айчыннай вайны, пры аднаўленні будынка захавалі яго планіроўку, але прыбралі парапет. У выніку перабудоў дом-камуна стаў інтэрнатам калідорнага тыпу, а першы паверх занялі крамы.

Пасля рэканструкцыі 1986 года будынак стаў жылым домам павышанай камфортнасці.

У цяперашні час кватэры ў гэтым доме лічацца элітным жыллём у Гомелі. Кватэры маюць высокія столі і сучасныя планіроўкі. Ёсць двух'ярусныя кватэры. На першым паверсе дома-камуны размешчаны банк, крамы адзення, абутку, аптэка.

Дому-камуне і лёсам яго жыхароў прысвечаны раман пад назвай "Дом камуны" Гомельскага пісьменніка і драматурга Васіля Ткачова.