Высокае. Царква Святога Ільі

Царква Святога Ільі ў мястэчку Высокае Аршанскага раёну пабудавана ў першай палове 19 стагоддзя. Фундатарам быў уладальнік мясцовага маёнтка Канстанцін Любамірскі. Царква з'яўляецца помнікам архітэктуры рэтраспектыўна – рускага стылю. Будынак складаецца з кананічных частак тагачаснага праваслаўнага храма: прытвор, трапезная, малітоўная зала і апсіда. Шырокі прытвор з высокай васьміграннай вежай – званіцай над ім, затым ідзе працяглая трапезная, кубападобная малітоўная зала разам з бакавымі прыдзеламі і паўкруглая апсіда з бакавымі рызніцамі. Над дахам раней быў купал. Архітэктурная пластыка ствараецца фігурнай цаглянай муроўкай. У савецкія часы царква была зачынена і прыйшла ў заняпад. Рэстаўрацыя пакуль не вядзецца.