Віцебск. Будынак жаночага епархіяльнага вучылішча.

Падчас прагулкі па гістарычным цэнтры Віцебска і наведвання амфітэатра, можна ўзысці на гару, дзе да нашага часу захаваўся помнік архітэктуры рэспубліканскага значэння – будынак былога жаночага епархіяльнага вучылішча.

Гэты будынак быў пабудаваны спецыяльна для гэтай установы ў 1901 – 1902 гадах. Грамадзянскі інжынер Аляксандр Паўлоўскі зрабіў праект галоўнага корпуса. А праект дапаможных памяшканняў выканаў інжынер Пётр Вінаградаў. Калісьці на гэтым месцы быў манастыр і царква Святога Духа. Галоўны корпус быў злучаны з царквой закрытай галерэяй.

У часы Першай сусветнай вайны ў будынках вучылішча быў размешчаны ваенны шпіталь. А ў савецкія гады пасля рэвалюцыі тут знаходзіўся штаб авіябрыгады. Пасля вайны ў 1940–х гадах Віцебскі філіял Інстытута "Белдзяржпраект" распрацаваў праект рэканструкцыі будынка жаночага вучылішча, пры гэтым дэкор галоўнага фасада быў захаваны. У 1970-я гады была зроблена прыбудова да асноўнага корпуса і пабудавана вежа з гадзіннікам на месцы былой царквы Святога Духа.

Будынак каменны, трохпавярховы Е-падобны ў плане. Галоўны фасад вучылішча вылучаны цэнтральным рызалітам, на якім ёсць балкон актавай залы на другім паверсе. Балкон падтрымлівае 4 слупа. У інтэр'еры планіроўка галерэйная. На першым і другім паверсе былі навучальныя класы, а на трэцім паверсе – спальныя пакоі. Цокаль быў прыстасаваны пад сталовую і кухню.

Зараз у помніку архітэктуры знаходзіцца Віцебскі абласны выканаўчы камітэт.