Відзы. Касцёл Святой Тройцы.

Першы каталіцкі касцёл у пасёлку Відзы быў заснаваны яшчэ ў 15 стагоддзі. Затым, у 18 стагоддзі, прадстаўнікі каталіцкага ордэна езуітаў заснавалі ўласны касцёл і школу. Касцёл быў зачынены ў 19 стагоддзі ў часы Расійскай імперыі.

Каталікі пачалі будаваць новы храм у пачатку 20-га стагоддзя і завяршылі перад самай вайной у 1914 годзе.

Касцёл лічыцца самым высокім у Беларусі, яго вышыня складае 59 метраў. Падчас Першай сусветнай вайны пад Відзамі праходзіў фронт, і будынак касцёла моцна пацярпеў - адна вежа была разбіта. Пасля вайны каталіцкая святыня была адноўлена (у польскі час), а ў памяць аб вайне ў сцены будынка былі ўмураваны некаторыя снарады.

Касцёл пабудаваны ў неагатычным стылі па праекце Вацлава Міхневіча (1866–1947), вядомага беларускага і літоўскага архітэктара. Храм уяўляе сабой трохнефавую базіліку, пабудаваную на каменным падмурку. Мае двухвежавы фасад з тэлескапічнымі шмат'яруснымі вежамі. Касцёл дзейны. Калі храм будзе адкрыты, і вы захочаце ўбачыць пейзажы і суседнюю Літву, якая знаходзіцца ўсяго за некалькі кіламетраў, папрасіце дазволу падняцца на вежу касцёла.