Тракенікі. Сядзіба Богуш – Шышкаў

У Астравецкім раёне ў мястэчку Тракенікі захавалася сядзіба роду Богуш – Шышкаў. Мястэчка знаходзіцца побач з трасай Вільнюс – Полацк. Сядзіба будавалася на мяжы 19 – 20 стагоддзяў ў стылі неабарока. Апошні гаспадар сядзібы – гэта мастак Мар'ян Богуш – Шышка.

 У часы Савецкага Саюза ў сядзібным доме знаходзілася праўленне мясцовага калгаса. Зараз тут працуе мясцовая бібліятэка. Да нашага часу ад сядзібы захаваўся дом, флігель, стайня і невялікі парк. Дом у сядзібе быў пабудаваны на пачатку 20 стагоддзя. Будынак мураваны, аднапавярховы, прамавугольны ў плане. Ёсць мансарда. У інтэр'еры захавалася вітая металічная лесвіца.

У гэтай сядзібе ў 1901 годзе нарадзіўся вядомы мастак, пісьменнік, мастацтвазнаўца Марыян Богуш – Шышка (1901 – 1995). У часы Першай сусветнай вайны сям'я пераехала жыць у Вільню, дзе Марыян вучыўся ў гімназіі. Служыў у польскай арміі. Вучыўся пасля вайны ў Віленскім універсітэце, дзе яго настаўнікам стаў вядомы беларускі і польскі мастак Фердынанд Рушчыц. Далей працягваў навучанне ў Кракаве ў Акадэміі мастацтва. Жыў і працаваў у горадзе Кобрын, дзе выкладаў матэматыку. У 1939 годзе ў час вайны прызваны ў войска. Патрапіў у палон.

Пасля вайны жыў у Італіі і Брытаніі. Прымаў удзел у шматлікіх мастацкіх выставах ва ўсім свеце. У Лондане ў 1982 годзе выйшла яго кніга «Аб мастацтве». Памёр ва ўзросце 94 год у 1995 годзе.