Смаляны. Спаская царква

У Смалянах па шляху да замка вы пабачыце з левага боку драўляную Спаскую царкву, пабудаваную ў 18 стагоддзі. Спачатку царква належыла ўніятам, а ў часы Расійскай імперыі была перададзена праваслаўным вернікам. У 1930 - я гады пры савецкай уладзе ў царкве размясцілі мясцовы спіртзавод. Царква пабудавана ў стылі барока ў традыцыях беларускага драўлянага дойлідства. Царква складаецца з двух частак: ніжняй часткі мураванай і верхняй драўлянай. У сваёй аснове будынак – гэта ў плане прамавугольны зруб даўжынёй  18 метраў, а шырынёй 13 метраў. Вышыня храма каля 22 метраў. Над уваходам храма размешчаны хоры, а на купале ў інтэр'еры захаваліся роспісы 18 стагоддзя з выявай 12 апосталаў. Апосталы намаляваны ў поўны рост. Выканананы роспісы тэмперай на дошках. Галоўны фасад двухвежавы. Вежы шматярусныя. У апошнія гады царква была адрамантавана. У храме знаходзіцца некалькі старадаўніх абразоў: «Жонкі – міраносіцы» 18 стагоддзя, «Каранаванне Маці Божай» 18 стагоддзе, «Укрыжаванне» 19 стагоддзе, «Святы Мікола» 19 стагоддзе, «Тайная вячэра» 19 стагоддзе. У цокальным ярусе ёсць таксама яшчэ адна мураваная царква.