Сінкевічы. Царква Святога Георгія

Паміж Мікашэвічамі і Лунінцом знаходзіцца мястэчка Сінкевічы з унікальнай царквой Святога Георгія. Царква пабудавана на мясцовых могілках разам вежай – званіцай.

 Размяшчаецца царква на самым усходзе мястэчка. Першапачаткова, мабыць, царква будавалася, як ўніяцкі храм, а потым была перадана праваслаўным вернікам.

Храм узведзены ў традыцыях драўлянага палескага народнага дойлідства і з'яўляецца ўнікальм помнікам архітэктуры. У 2003 годзе на Беларусі была выпушчана марка з выявай гэтай царквы.

 У інтэр'еры маюцца старажытныя абразы 18 – 19 стагоддзяў і ў тым ліку: «Нараджэнне Хрыстова», «Дабравешчанне», «Святы Касьма, Аляксей і Дзям'ян».

Будынак складаецца з чатырох асноўных частак: прытвор, трапезная, малітоўная зала і апсіда. Царква складаецца з трохзрубнай пабудовы з трыма прамавугольнымі ў плане аб'ёмамі, якія роўныя па вышыні. Над малітоўнай залай асноўнага аб'ёму надбудаваны масіўны невысокі чацвярык, які накрыты чатырохскатным дахам. Трапезная і апсіда накрыты вальмавым дахам.

Перад царквой пабудавана зрубна – каркасная двухярусная вежа – званіца, якая накрыта чатырохскатным дахам. Першапачаткова дах царквы і званіцы быў пакрыты дранкай.