Поразава. Царква Святой Троіцы

Мястэчка Поразава вядома з 15 стагоддзя і знаходзіцца на ўскраіне Белавежскай пушчы. З 16 стагоддзя мела права Магдэбургскае. На гербе мястэчка была выява Найсвяцейшай Дзевы Марыі. Калі была ў Поразава пабудавана першая праваслаўная царква дакладна невядома. Ёсць толькі звесткі, што ў 19 стагоддзі ў мястэчку быў драўляны стары храм у гонар Раства Прасвятой Багародзіцы. У 1858 годзе ў Палаце Дзяржаўнай маёмасці абмяркоўвалася пытанне аб будаўніцтве новай царквы.

У 1868 годзе пачала працаваць часовая праваслаўная царква ў гонар Святога МІкалая. У той жа час пачалося будаўніцтва новай мураванай царквы ў гонар Святой Троіцы на што спатрэбілася 4 гады. Сродкі на новы храм былі выдзелены з казны і збіраліся прыхаджанамі. Царква была пабудавана ў 1872 годзе ў рэтраспектыўна- рускім стылі. Будынак складаецца з чатырох асноўных частак: прытвор, трапезная, малітоўная зала і апсіда. Над прытворам шматярусная вежа – званіца васьмярык на чацвярыку. Прамавугольная ў плане малітоўная зала, накрытая двусхільным дахам х васьмігранным барабанам і цыбулінай. Святар царквы Юліян Шырынскі ў 1880 годзе быў узнагароджаны за службу набедранікам.

У 1898 годзе ў новай царкве адбыўся вялікі пажар і былі пашкоджаны дах і алтарная частка. Гродзенскі генерал – губернатар князь Святаполк – Мірскі ахвяраваў на рамонт царквы 100 рублёў. У 1903 годзе пасля рамонта царква была зноў асвячоная. У 1905 годзе перабудаваны алтар. У 1905 годзе да царквы адносілася 25 вёсак з 3 тысячамі прыхаджан. На тэрыторыі прыхода было 4 царкоўна – прыхадскія школы. У савецкія часы царква працавала. У апошнія гады праведзены рамонт.