Моўчадзь. Царква Пятра і Паўла.

У цэнтры мястэчка Моўчадзь Баранавіцкага раёна ўзвышаецца мураваная праваслаўная царква Пятра і Паўла. Храм узведзены ў 19 стагоддзі ў часы Расійскайі імперыі ў псеўдарускім стылі.

Узвялі будынак па тыпавым праекце, а дапрацаваў праект архітэктар Мікалай Ціхвінскі. Пачалося будаўніцтва ў 1869 годзе. Купцы Нахман Буткоўскі, Абрам Прэхнер і Шыман Скідзельскі былі падрадчыкамі. Дабудавалі святыню ў 1873 годзе.

У1897 годзе настаяцелем пры царкве быў Венядзікт Качаноўскі і пры храме існавала царкоўна–прыхадское папячыцельства. Была таксама пяць царкоўна–прыхадскіх школ, якія працавалі пры прыходзе ў бліжэйшых вёсках. У Моўчадзі працавала народнае вучылішча з 130 вучнямі.

Пры храме таксама была драўляная царква Святога Крыжа са званіцай на мясцовых могілках. Могілкавы храм быў узведзены ў 1800 годзе за сродкі Валовіча, і, мабыць, першапачаткова належыў уніятам.

Царква Пятра і Паўла пабудавана на ўзгорку пасярод мястэчка на тым месцы, дзе быў калісці каталіцкі касцёл. Складаецца будынак з кананічных асноўных чатырох частак: прытвор, трапезная, малітоўная зала і апсіда. Над прытворам узведзена шматярусная вежа–званіца васьмярык на чацвярыку. Над асноўным аб'ёмам узвышаецца пяць купалоў.