Магілёў. Дом гарадской управы.

  На плошчы Славы горада Магілёва знаходзіцца некалькі старажытных будынкаў. Раней плошча называлася Гандлёвая ў часы Вялікага Княства Літоўскага, а ў часы Расійскай імперыі Губернатарская. Многія гістарычныя будынкі не дайшлі да нашага часу. Але злева ад ратушы захаваўся будынак былой гарадской управы.

  Першапачаткова будынак быў прыстасаваны пад гандлёвыя рады гандлёвай плошчы, і, магчыма, што дом пабудавалі ў 18 стагоддзі, а ў 19 стагоддзі ў часы Расійскай імперыі перабудавалі ў стылі класіцызму і псеўдарускім стылі. Быў надбудаваны трэці паверх. У часы Першай сусветнай вайны, калі ў Магілёве была Стаўка Вярхоўнага Галоўнакамандуючага расійскай арміі, у гэтым доме былі ўстановы стаўкі і сталовая. Гэты дом наведваў імператар Расійскай імперыі Мікалай II.

Пасля рэвалюцыі ў будынку быў дом культуры салдат Чырвонай Арміі. У будынку праводзіліся сустрэчы з беларускімі пісьменнікамі ў перыяд беларусізацыі ў 1920-я гады. Падчас гітлераўскай акупацыі ў будынку знаходзіўся Дом культуры салдат вермахта.

  Пасля вайны будынак аднавілі, і тут працаваў Дом культуры будтрэста № 12. Пасля развалу СССР помнік адрэстаўравалі і пераабсталявалі пад гарадскі ЗАГС.