Мінск. Будынак мужчынскага духоўнага вучылішча.

       У горадзе Мінску на скрыжаванні вуліцы Рэвалюцыйнай і вуліцы Леніна знаходзіцца будынак былога мужчынскага духоўнага вучылішча. Будынак узведзены з цэглы ў другой палове 18-га стагоддзя ў часы Вялікага Княства Літоўскага.

        Спачатку дом быў Г-падобны ў плане, меў два паверхі з цокальным паверхам. Будынак адносіўся да гарадской сядзібы Пшаздзецкіх, і быў флігелем пры сядзібе. У часы Расійскай імперыі ў 19 стагоддзі будынак перабудавалі. Дом стаў П-вобразным у плане. У тарцовых частках на доме надбудавалі трэці паверх.

        У той перыяд 19-пачатку 20-га стагоддзя ў гэтым будынку працавала Мужчынскае духоўнае вучылішча. Па іншых звестках, тут быў інтэрнат вучылішча.

        Пасля рэвалюцыі ў доме працавалі савецкія ўстановы: Наркамат асветы Савецкай Беларусі, у перыяд 1922 – 1925 гадоў працаваў Інстытут беларускай культуры (Інбелкульт).

     Супрацоўнікамі Інбелкульта былі вядомыя беларускія навукоўцы і грамадскія дзеячы: філолаг Сцяпан Некрашэвіч, гісторык Усевалад Ігнатоўскі, пісьменнік Максім Гарэцкі, географ Мікалай Азбукін, паэт Міхайла Грамыка, народныя паэты Янка Купала і Якуб Колас і многія іншыя дзеячы.

         У 1990-я гады ля будынка быў усталяваны помнік Максіму Гарэцкаму - класіку беларускай літаратуры.

     Пасля Вялікай Айчыннай вайны працаваў кінатэатр. Зараз тут працуюць розныя ўстановы, напрыклад камітэт па архітэктуры і будаўніцтве.