Мінск. Музей гісторыі Беларускай чыгункі.

У самым цэнтры Мінска, у непасрэднай блізкасці ад Прывакзальнай плошчы, пасля маштабнага абнаўлення зноў прымае наведвальнікаў Музей гісторыі Беларускай чыгункі. Размешчаны на першым паверсе будынка па адрасе вуліца Бабруйская, 4, ён уяўляе сабой не проста збор экспанатаў, а сапраўдную машыну часу, якая дазваляе прасачыць больш чым паўтаравекавую гісторыю сталёвых магістраляў краіны.

Музей, які вядзе сваю гісторыю з 1971 года (калі ён быў створаны на грамадскіх пачатках, а ў 1987-м атрымаў статус ведамаснага), з кастрычніка 2025 года паўстае перад гасцямі ў абноўленым выглядзе. Пасля рэканструкцыі тут была створана новая пастаянная экспазіцыя, якая, захоўваючы багатую спадчыну, падае яе з выкарыстаннем сучасных музейных тэхналогій.

Сёння фонды музея налічваюць больш за 13 тысяч адзінак захоўвання. Гэта не проста сухія дакументы і фатаграфіі - гэта жывыя сведчанні эпох. Экспазіцыя ахоплівае перыяд з XIX стагоддзя і да нашых дзён, распавядаючы аб будаўніцтве першых чыгуначных ліній на тэрыторыі Беларусі, развіцці дарогі ў складзе Расійскай імперыі, трагічных і гераічных старонках Вялікай Айчыннай вайны, аднаўленні і мадэрнізацыі ў савецкі час і сучасным этапе развіцця беларускай магістралі.

Асаблівую цікавасць у наведвальнікаў выклікаюць унікальныя тэхнічныя артэфакты. Сярод экспанатаў можна ўбачыць старадаўнія шляхавыя інструменты, сродкі сувязі мінулага, кампосцеры і нават арыфмометры - сведкі першых крокаў аўтаматызацыі разлікаў. Каштоўнасць калекцыі падкрэслівае і той факт, што многія прадметы былі перададзеныя ў дар сем'ямі чыгуначнікаў, што робіць гісторыю больш асабістай і кранальнай. Асобнай увагі заслугоўваюць друкаваныя выданні з фондаў навукова-тэхнічнай бібліятэкі ЦНТІ - некаторыя з іх датуюцца сярэдзінай XIX стагоддзя. Багацце дакументаў, фатаграфій, карт і тэхнічных чарцяжоў дазваляе скласці поўнае ўяўленне пра тое, як змянялася чыгуначная справа на працягу стагоддзяў.

Музей гісторыі Беларускай чыгункі сёння - гэта не толькі сховішча рарытэтаў, але і актыўная пляцоўка для культурных і прафесійных зносін. Супрацоўнікі музея, якi ўваходзіць у структуру цэнтра навукова-тэхнічнай інфармацыі (ЦНТІ), самі пастаянна вывучаюць гісторыю, пераймаючы вопыт у калег. Для наведвальнікаў музей прапануе экскурсіі, якія праводзяць вопытныя гіды. Прычым, што асабліва прыемна, экскурсійнае абслугоўванне ажыццяўляецца на бясплатнай аснове. Для тых жа, хто аддае перавагу самастойнаму знаёмству, даступны індывідуальны аўдыягід.

Важная інфармацыя для планавання візіту:

Музей працуе толькі па папярэднім запісе з панядзелка па пятніцу з 8:00 да 17:00 (з абедзенным перапынкам з 12:00 да 13:00). Субота і нядзеля - выхадныя дні.

Запісацца на экскурсію можна па тэлефоне +375 (17) 225-54-79 або па электроннай пошце mi@cnti.rw.by

Наведванне гэтага музея стане займальным падарожжам не толькі для спецыялістаў і ветэранаў стальной магістралі, але і для ўсіх, хто цікавіцца гісторыяй тэхнікі і развіццём транспартнай сістэмы Беларусі. Гэта ўнікальная магчымасць дакрануцца да мінулага і ўбачыць, як кавалася індустрыяльная моц краіны.