Лань. Свята-Пакроўская царква.

У Нясвіжскім раёне ў мястэчку Лань захавалася драўляная праваслаўная царква, якую асвяцілі ў гонар Пакрава Прасвятой Багародзіцы. Храм узведзены на самым ускрайку мястэчка на мясцовых могілках.

        Святыня пабудавана ў часы Расійскай імперыі ў 1842 – 1844 гадах. Сродкі на пабудову царквы далі князь Радзівіл і памешчык Грыневіч. Мясцовыя землі, дзе размяшчаўся прыход царквы, належылі гэтым памешчыкам.

          Праз нейкі час, у 1863 годзе, царква была перабудавана. Сродкі на перабудову былі выдзелены дзяржаўнай казной. Усяго было вылучана на храм і іканастас 2202 рублі. У 1874 годзе на супраць царквы была пабудавана мураваная брама–званіца з бутавага камяня. Брама зроблена ў тэхніцы ізюмнай кладкі.

Потым храм адрамантавалі ў пачатку 20 стагоддзя ў 1904 годзе.

        Пасля Вялікай Айчыннай вайны царкву зачынілі ў 1962 годзе. Напрыканцы існавання Савецкага Саюза ў 1990 годзе будынак перадалі праваслаўным вернікам. Царкву зноў асвяцілі і пачалі праводзіць службы. У 1992 годзе адбыўся пажар і быў пашкоджаны помнік. Храм адбудавалі і адрамантавалі.

       Царква пабудавана ў стылі народнага драўлянага дойлідства. Будынак складаецца з трох асноўных архітэктурных частак: прытвор, малітоўная зала і апсіда. Асноўны аб'ём накрыты чатырохсхільным дахам.