Клюшчаны. Касцёл Святога Яўхіма.

У Астравецкім раёне ў мястэчку Клюшчаны ёсць драўляны Каталіцкі Касцёл Святога Іаахіма. Касцёл пабудаваны ў часы Вялікага Княства Літоўскага ў 1726 годзе за сродкі я.Корсака. Быў адрамантаваны ў часы Расійскай імперыі ў 1905 годзе.

Нейкі час ксяндзом пры касцёле служыў Казімір Сваяк (1890-1926) - паэт і драматург, літаратуразнаўца і публіцыст. Сапраўднае імя Канстанцін Стаповіч. Вучыўся ў Віленскай каталіцкай духоўнай семінарыі.

У чэрвені 1915 года ў газеце «Беларус» было надрукавана віншаванне ксяндзу Канстанціну Стаповічу ад парафіянаў Клюшчан з прычыны яго першай імшы ў тутэйшым касцёле Святога Іаахіма.

Стаповіч у Клюшчанах стварыў хор, дзе спявалі дзяўчаты і хлопцы з розных вёсак і мястэчак: Кісялёва, Вялікай Казаноўшчыны, Будрань, Пятрашышак і Трашчанаў. Сам Стаповіч умеў граць на скрыпцы і меў лірычны тэнар. Разам з хорам развучвалі рэлігійныя і беларускія народныя песні: "Гусі", "Красна каліначка", "Салавейка" і "Зялёны дубочак".

Імшу ксёндз вёў на беларускай мове.

У Клюшчанах быў створаны нелегальны гурток "Саюз сваякоў" для самаадукацыі на аснове хрысціянскай этыкі.

У ваколіцах мястэчка з дапамогай ксяндза Стаповіча было створана сем школ. Былі адкрыты курсы падрыхтоўкі настаўнікаў, а падручнікі прывозілі з Вільні.

За беларусізацыю касцёла ксяндза Стаповіча ў 1916 годзе перавялі ў іншы касцёл на Беласточчыне.

Казімір Сваяк памёр у 1926 годзе ад сухотаў. Ён прасіў сяброў і паплечнікаў, каб яго пахавалі ў Клюшчанах. Але пахавалі паэта ў Вільні на могілках Росы.

У 1936 годзе, калі яму адкрывалі помнік у Вільні, з Клюшчан прыйшла пешшу за 80 кіламетраў вялікая група моладзі.

Касцёл быў зачынены пасля Вялікай Айчыннай вайны, і вернуты каталіцкім вернікам у 1990 годзе. Некалькі гадоў таму храм быў моцна пашкоджаны падчас пажару. Храм цяпер знаходзіцца на стадыі аднаўлення.

Вакол храма ўзведзена каменная агароджа з варотамі з цэглы і бутавага каменя.

Недалёка ад касцёла ў мястэчку Шайкуны захавалася каменная капліца 19-га стагоддзя і парк ад былой сядзібы.