Кабакі. Сядзіба Свянціцкіх

Паміж Бярозай і Пружанамі ёсць старажытнае мястэчка Кабакі ў Бярозаўскім раёне з парэшткамі панскай сядзібы. 

Упершыню мястэчка ўпамінаецца ў гістарычных крыніцах у часы Вялікага Княства Літоўскага ў 1563 годзе. Спачатку ўваходзіла ў склад Кобрынскай эканоміі. Было створана Кабацкае войтаўства. У адміністрацыйных адносінах уваходзіла ў склад Брэсцкага павета Брэсцкага ваяводства.

Пасля трэцяга падзелу Рэчы Паспалітай з 1795 года ў складзе Расійскай імперыі. Кабакі ўваходзяць у Пружанскі ўезд Гродзенскай губерніі.

Загадам імператрыцы Кацярыны ІІ мястэчка было падаравана разам з бліжэйшымі вёскамі нашчадкам генерал – фельдмаршала Пятра Румянцава – Задунайскага. А нашчадкі фельдмаршала прадалі мястэчка Паўлу Ягміну (1794 – 1865) – дзяржаўнаму служачаму і памешчыку.

У 19 стагоддзі мястэчка перайшло да роду Уладэкаў. У 1856 годзе ў Кабяках гаспадарыць Антон Уладэк, якому належыць 1118 чалавек. У 1886 годзе ў маёнтку працавалі цагельны завод, бровар, ветраны млын і іншыя гаспадарчыя пабудовы.

У пачатку 20 стагоддзя перайшло да Вітольда Свянціцкага праз шлюб з Сафіяй Уладэк. У часы Першай сусветнай вайны з 1915 года пад нямецкай акупацыяй. У перыяд 1921 – 1939 гады пад уладай Польскай дзяржавы.

 Да нашага часу захаваліся гаспадарчыя пабудовы і парк сядзібы Свянціцкіх. У жылым доме 1912 годзе дагэтуль жывуць людзі, у добрым стане будынак бровара. Будынак палаца быў разабраны пасля вайны ў 1950 – я гады.