Хоцімск. Свята-Троіцкі сабор

Яшчэ з часоў Рэчы Паспалітай была вядомая царква Святой Троіцы ў Хоцімску. Храм быў драўляны і да нашага часу не захаваўся. У 1861 годзе ў невялікім мястэчку Хоцімск у гонар адмены прыгоннага права была закладзена царква Святой Троіцы. Асвяцілі храм у маі 1873 года на свята Пяцідзясятніцу. Асвячэнне праводзіў магілёўскі архіепіскап Яўсевій. У царкве былі створаны прыдзелы ў гонар Казанскай іконы Божай Маці і Святога Мікалая. Царква пабудавана ў самым цэнтры гарадка на гандлёвай плошчы, што адразу ператварыла храм у гарадскую дамінанту. За савецкім часам святыню зачынілі ў 1930-х гадах. Тут працавалі банк, школа механізатараў, склад і раённы Дом культуры. У часы гітлераўскай акупацыі набажэнства было адноўлена. Пасля вайны ў царкве быў склад і Дом культуры. І толькі пасля развалу Савецкага саюза і звароту да ўладаў грамадскасці ў 1992 годзе святыня вярнулася да вернікаў. Пры саборы дзейнічае нядзельная школа для прыхаджан.