Гродна. Вул. Савецкая, дом 1.

У дома ў пачатку вуліцы Савецкай, які выходзіць на Савецкую плошчу, цікавая і багатая гісторыя. Будынак узведзены ў 16 стагоддзі, а потым перабудоўваўся некалькі разоў.

Дом двух і трохпавярховы П-падобны. Першапачаткова тут была гарадская карчма ў 16 стагоддзі, якая называецца ў дакументах «Дом мейский Гасціны». Кароль Стэфан Баторый даў прывілей у 1579 годзе, каб карчма вызвалялася ад падаткаў па продажы алкагольных напояў.

У 1742 годзе на гэтым месцы быў пабудаваны палац магнатаў Сангушак. Тут гаспадарамі палаца і карчмы быў Павел Караль Сангушка, які займаў пасаду Вялікага літоўскага маршалка. А затым яго сыны: Юзаф Паўлін - маршалак вялікі літоўскі і Януш Аляксандр - надворны літоўскі маршалак.

З 1773 года Антоній Тызенгаўз - надворны літоўскі падскарбій - узяў дом у арэнду для размяшчэння ў будынку кадэцкага корпуса. У 1778 годзе будынак набывае ў прыватную ўласнасць непасрэдна А.Тызенгаўз.

У 19 стагоддзі былі новыя гаспадары: Кацнеленбогены і Левінсоны. Кошт маёмасці ў 1886 годзе ацэньваўся ў 8.400 рублёў. У 1910 складала 47 750 рублёў.

Будынак здаваўся пад арэнду кватэр і крамаў. Тут прадавалі бакалею, абутак, канцылярскія прыналежнасці. Працавала аптэка, банкаўская кантора і склад.

У міжваенны перыяд Польскай дзяржавы працавала турыстычнае бюро"Орбіус". Пасля вайны дыетычная сталовая, цырульня і "Саюздрук". Цяпер тут крама адзення і сувеніраў «Ратушная».