Вялікія Свіранкі. Касцёл Святога Юрыя.

У цэнтры мястэчка Вялікія Свіранкі Астравецкага раёна знаходзіцца старажытны каталіцкі касцёл Святога Юрыя. Першыя дакументы пра касцёл у мястэчку маюцца за 15 стагоддзе часоў Вялікага Княства Літоўскага.

Храм быў пабудаваны за сродкі гаспадара мясцовага маёнтка князя Свірскага. Жонка князя ахвяравала сродкі і маёмасць касцёлу. У пачатку 16 стагоддзя шэсць азёр запісаў на утрыманне касцёла князь Ян Талімунтавіч. У 1543 годзе зроблены фундуш на плябань княжной Марынай Жданавай Свірскай. У 16 стагоддзі, калі гаспадаром мясцовага маёнтка быў Рыгор Осцік, то ў гэты час касцёл быў аднавежавы, драўляны храм. У сярэдзіне 17 стагоддзя ў час вайны паміж Рэччу Паспалітай і царствам Маскоўскім святыня загінула. У 1671 годзе касцёл быў адбудаваны за сродкі Віленскай капітулы. Праз пэўны час у 1690 годзе пры храме пабудаваны драўляны манастыр місіянераў. Быў заснаваны шпіталь.

У Паўночную вайну касцёл моцна пацярпеў, але быў адбудаваны праз намаганні суфрагана віленскага Мацея Юзэфа Анцуты. Каля касцёла ўзведзена двухярусная званіца ў 1910 годзе.

Помнік мае прамавугольную планіроўку. Да асноўнага аб'ёма прыбудавана пяціграная апсіда. Касцёл накрыты двухсхільным дахам. Над апсідай вальмавы дах. Галоўны фасад мае трохвугольны франтон і фланкіраваны чацверыковымі вежамі. У інтэр'еры маюцца хоры і баракальныя алтары.

У мястэчку захаваліся брукаваныя вуліцы.