Вялікая Сваротва. Рэшткі сядзібы Незабытоўскіх.

У мястэчка Вялікая Сваротва Баранавіцкага раёна ўсе едуць пабачыць перадусім унікальную праваслаўную царкву, якая ў плане мае трохкутнік. У мястэчку таксама захаваліся парэшткі палацава–паркавага ансамбля Незабытоўскіх.

 У часы Вялікага Княства Літоўскага ў 18 стагоддзі мястэчка належыла роду Юндзіцкіх. У перыяд Расійскай імперыі ў пачатку 19 стагоддзя новымі гаспадарамі сталі Незабытоўскія.

Якуб Незабытоўскі ажаніўся з Францішкай Кунцэвіч і ў іх нарадзіўся сын Стэфан, які стаў гродзенскім маршалкам. У часы Якуба Незабытоўскага была пабудаваны вялікі палац з гаспадарчымі пабудовамі і паркам. Палац быў зруйнаваны ў 1917 годзе і больш не аднаўляўся.

 Дачка Стэфана Марыя выйшла замуж за графа Родрыка Патоцкага. Наступны гаспадар сядзібы - яе ўнук Уладзіслаў Патоцкі, які стаў апошнім уладальнікам сядзібы ў 1939 годзе.

Сядзіба складалася з шматлікіх будынкаў і парка: мураваны двухпавярховы палац у стылі ампір, флігель, гаспадарчыя пабудовы, аранжарэя. Парк пейзажны з элементамі рэгулярнай планіроўкі каля сямі гектараў: былі альтанкі, водныя каналы з мастамі і іншае.

У 19 стагоддзі сядзібу наведаў мастак і кампазітар Напалеон Орда, які пакінуў малюнак з выявай палаца і парка. Да нашага часу захаваўся парк і руіны гаспадарчых пабудоў.